‘‘ยทา ทกฺขิสิ เหมนฺเต, ปุปฺผิเต ธรณีรุเห;
สุรภิํ สมฺปวายนฺเต, น รชฺชสฺส สริสฺสสิฯ
[1741]
‘‘ยทา เหมนฺติเก มาเส, หริตํ ทกฺขิสิ เมทนิํ [เมทินิํ (สี. ปี.)];
อินฺทโคปกสญฺฉนฺนํ, น รชฺชสฺส สริสฺสสิฯ
[1742]
‘‘ยทา ทกฺขิสิ เหมนฺเต, ปุปฺผิเต ธรณีรุเห;
กุฏชํ พิมฺพชาลญฺจ, ปุปฺผิตํ โลทฺทปทฺมกํ [โลมปทฺธกํ (สี. ปี.)];
สุรภิํ สมฺปวายนฺเต, น รชฺชสฺส สริสฺสสิฯ
[1743]
‘‘ยทา เหมนฺติเก มาเส, วนํ ทกฺขิสิ ปุปฺผิตํ;
โอปุปฺผานิ จ ปทฺมานิ, น รชฺชสฺส สริสฺสสิ’’ฯ
เหมวนฺตํ นามฯ
ทานกณฺฑํ
[1744]
‘‘เตสํ ลาลปฺปิตํ สุตฺวา, ปุตฺตสฺส สุณิสาย จ;
กลุนํ [กรุณํ (สี. ปี.), กลูนํ (สฺยา. ก.)] ปริเทเวสิ, ราชปุตฺตี ยสสฺสินีฯ
[1745]
‘‘เสยฺโย วิสํ เม ขายิตํ, ปปาตา ปปเตยฺยหํ;
รชฺชุยา พชฺฌ มิยฺยาหํ, กสฺมา เวสฺสนฺตรํ ปุตฺตํ;
ปพฺพาเชนฺติ อทูสกํฯ
[1746]
‘‘อชฺฌายกํ ทานปติํ, ยาจโยคํ อมจฺฉริํ;
ปูชิตํ ปฏิราชูหิ, กิตฺติมนฺตํ ยสสฺสินํ;
กสฺมา เวสฺสนฺตรํ ปุตฺตํ, ปพฺพาเชนฺติ อทูสกํฯ
[1747]
‘‘มาตาเปตฺติภรํ ชนฺตุํ, กุเล เชฏฺฐาปจายิกํ;
กสฺมา เวสฺสนฺตรํ ปุตฺตํ, ปพฺพาเชนฺติ อทูสกํฯ
[1748]
‘‘รญฺโญ หิตํ เทวิหิตํ, ญาตีนํ สขินํ หิตํ;
หิตํ สพฺพสฺส รฏฺฐสฺส, กสฺมา เวสฺสนฺตรํ ปุตฺตํ;
ปพฺพาเชนฺติ อทูสกํฯ
[1749]
‘‘มธูนิว ปลาตานิ, อมฺพาว ปติตา ฉมา;
เอวํ เหสฺสติ เต รฏฺฐํ, ปพฺพาเชนฺติ อทูสกํฯ
[1750]
‘‘หํโส นิขีณปตฺโตว, ปลฺลลสฺมิํ อนูทเก;
อปวิฏฺโฐ อมจฺเจหิ, เอโก ราชา วิหิยฺยสิฯ
[1751]
‘‘ตํ ตํ พฺรูมิ มหาราช, อตฺโถ เต มา อุปจฺจคา;
มา นํ สิวีนํ วจนา, ปพฺพาเชสิ อทูสกํ’’ฯ
[1752]
‘‘ธมฺมสฺสาปจิติํ กุมฺมิ, สิวีนํ วินยํ ธชํ;
ปพฺพาเชมิ สกํ ปุตฺตํ, ปาณา ปิยตโร หิ เม’’ฯ
[1753]
‘‘ยสฺส ปุพฺเพ ธชคฺคานิ, กณิการาว ปุปฺผิตา;
ยายนฺตมนุยายนฺติ, สฺวชฺเชโกว คมิสฺสติฯ
[1754]
‘‘ยสฺส ปุพฺเพ ธชคฺคานิ, กณิการวนานิว;
ยายนฺตมนุยายนฺติ , สฺวชฺเชโกว คมิสฺสติฯ
[1755]
‘‘ยสฺส ปุพฺเพ อนีกานิ, กณิการาว ปุปฺผิตา;
ยายนฺตมนุยายนฺติ, สฺวชฺเชโกว คมิสฺสติฯ
[1756]
‘‘ยสฺส ปุพฺเพ อนีกานิ, กณิการวนานิว;
ยายนฺตมนุยายนฺติ, สฺวชฺเชโกว คมิสฺสติฯ
[1757]
‘‘อินฺทโคปกวณฺณาภา, คนฺธารา ปณฺฑุกมฺพลา;
ยายนฺตมนุยายนฺติ, สฺวชฺเชโกว คมิสฺสติฯ
[1758]
‘‘โย ปุพฺเพ หตฺถินา ยาติ, สิวิกาย รเถน จ;
สฺวชฺช เวสฺสนฺตโร ราชา, กถํ คจฺฉติ ปตฺติโกฯ
[1759]
‘‘กถํ จนฺทนลิตฺตงฺโค, นจฺจคีตปฺปโพธโน;
ขุราชินํ ผรสุญฺจ, ขาริกาชญฺจ หาหิติ [หาริติ (สฺยา. ก.)]ฯ
[1760]
‘‘กสฺมา นาภิหริสฺสนฺติ, กาสาว อชินานิ จ;
ปวิสนฺตํ พฺรหารญฺญํ, กสฺมา จีรํ น พชฺฌเรฯ
[1761]
‘‘กถํ นุ จีรํ ธาเรนฺติ, ราชปพฺพาชิตา ชนา;
กถํ กุสมยํ จีรํ, มทฺที ปริทหิสฺสติฯ
[1762]
‘‘กาสิยานิ จ ธาเรตฺวา, โขมโกฏุมฺพรานิ จ;
กุสจีรานิ ธาเรนฺตี, กถํ มทฺที กริสฺสติฯ
[1763]
‘‘วยฺหาหิ ปริยายิตฺวา, สิวิกาย รเถน จ;
สา กถชฺช อนุชฺฌงฺคี, ปถํ คจฺฉติ ปตฺติกาฯ
[1764]
‘‘ยสฺสา มุทุตลา หตฺถา, จรณา จ สุเขธิตา;
สา กถชฺช อนุชฺฌงฺคี, ปถํ คจฺฉติ ปตฺติกาฯ
[1765]
‘‘ยสฺสา มุทุตลา ปาทา, จรณา จ สุเขธิตา;
ปาทุกาหิ สุวณฺณาหิ, ปีฬมานาว คจฺฉติ;
สา กถชฺช อนุชฺฌงฺคี, ปถํ คจฺฉติ ปตฺติกาฯ
[1766]
‘‘ยาสฺสุ อิตฺถิสหสฺสานํ, ปุรโต คจฺฉติ มาลินี;
สา กถชฺช อนุชฺฌงฺคี, วนํ คจฺฉติ เอกิกาฯ
[1767]
‘‘ยาสฺสุ สิวาย สุตฺวาน, มุหุํ อุตฺตสเต ปุเร;
สา กถชฺช อนุชฺฌงฺคี, วนํ คจฺฉติ ภีรุกาฯ
[1768]
‘‘ยาสฺสุ อินฺทสโคตฺตสฺส, อุลูกสฺส ปวสฺสโต;
สุตฺวาน นทโต ภีตา, วารุณีว ปเวธติ;
สา กถชฺช อนุชฺฌงฺคี, วนํ คจฺฉติ ภีรุกาฯ
[1769]
‘‘สกุณี หตปุตฺตาว, สุญฺญํ ทิสฺวา กุลาวกํ;
จิรํ ทุกฺเขน ฌายิสฺสํ, สุญฺญํ อาคมฺมิมํ ปุรํฯ
[1770]
‘‘สกุณี หตปุตฺตาว, สุญฺญํ ทิสฺวา กุลาวกํ;
กิสา ปณฺฑุ ภวิสฺสามิ, ปิเย ปุตฺเต อปสฺสตีฯ
[1771]
‘‘สกุณี หตปุตฺตาว, สุญฺญํ ทิสฺวา กุลาวกํ;
เตน เตน ปธาวิสฺสํ, ปิเย ปุตฺเต อปสฺสตีฯ
[1772]
‘‘กุรรี [กุรุรี (สฺยา. ก.)] หตฉาปาว, สุญฺญํ ทิสฺวา กุลาวกํ;
จิรํ ทุกฺเขน ฌายิสฺสํ, สุญฺญํ อาคมฺมิมํ ปุรํฯ
[1773]
‘‘กุรรี หตฉาปาว, สุญฺญํ ทิสฺวา กุลาวกํ;
กิสา ปณฺฑุ ภวิสฺสามิ, ปิเย ปุตฺเต อปสฺสตีฯ
[1774]
‘‘กุรรี หตฉาปาว, สุญฺญํ ทิสฺวา กุลาวกํ;
เตน เตน ปธาวิสฺสํ, ปิเย ปุตฺเต อปสฺสตีฯ
[1775]
‘‘สา นูน จกฺกวากีว, ปลฺลลสฺมิํ อนูทเก;
จิรํ ทุกฺเขน ฌายิสฺสํ, สุญฺญํ อาคมฺมิมํ ปุรํฯ
[1776]
‘‘สา นูน จกฺกวากีว, ปลฺลลสฺมิํ อนูทเก;
กิสา ปณฺฑุ ภวิสฺสามิ, ปิเย ปุตฺเต อปสฺสตีฯ
[1777]
‘‘สา นูน จกฺกวากีว, ปลฺลลสฺมิํ อนูทเก;
เตน เตน ปธาวิสฺสํ, ปิเย ปุตฺเต อปสฺสตีฯ
[1778]
‘‘เอวํ เม วิลปนฺติยา, ราชา ปุตฺตํ อทูสกํ;
ปพฺพาเชสิ วนํ รฏฺฐา, มญฺเญ หิสฺสามิ ชีวิตํ’’ฯ
[1779]
‘‘ตสฺสา ลาลปฺปิตํ สุตฺวา, สพฺพา อนฺเตปุเร พหู [อหุ (สฺยา. ก.)];
พาหา ปคฺคยฺห ปกฺกนฺทุํ, สิวิกญฺญา สมาคตาฯ
[1780]
‘‘สาลาว สมฺปมถิตา, มาลุเตน ปมทฺทิตา;
เสนฺติ ปุตฺตา จ ทารา จ, เวสฺสนฺตรนิเวสเนฯ
[1781]
‘‘โอโรธา จ กุมารา จ, เวสิยานา จ พฺราหฺมณา;
พาหา ปคฺคยฺห ปกฺกนฺทุํ, เวสฺสนฺตรนิเวสเนฯ
[1782]
‘‘หตฺถาโรหา อนีกฏฺฐา, รถิกา ปตฺติการกา;
พาหา ปคฺคยฺห ปกฺกนฺทุํ, เวสฺสนฺตรนิเวสเนฯ
[1783]
‘‘ตโต รตฺยา วิวสาเน, สูริยสฺสุคฺคมนํ ปติ;
อถ เวสฺสนฺตโร ราชา, ทานํ ทาตุํ อุปาคมิฯ
[1784]
‘‘วตฺถานิ วตฺถกามานํ, โสณฺฑานํ เทถ วารุณิํ;
โภชนํ โภชนตฺถีนํ, สมฺมเทว ปเวจฺฉถฯ
[1785]
‘‘มา จ กิญฺจิ วนิพฺพเก, เหฏฺฐยิตฺถ อิธาคเต;
ตปฺเปถ อนฺนปาเนน, คจฺฉนฺตุ ปฏิปูชิตาฯ
[1786]
‘‘อเถตฺถ วตฺตตี สทฺโท, ตุมุโล เภรโว มหา;
ทาเนน ตํ นีหรนฺติ, ปุน ทานํ อทา ตุวํ [อยํ คาถา สี. สฺยา. ปี. โปตฺถเกสุ น ทิสฺสติ]ฯ
[1787]
‘‘เตสุ มตฺตา กิลนฺตาว, สมฺปตนฺติ วนิพฺพกา;
นิกฺขมนฺเต มหาราเช, สิวีนํ รฏฺฐวฑฺฒเนฯ
[1788]
‘‘อจฺเฉจฺฉุํ วต โภ รุกฺขํ, นานาผลธรํ ทุมํ;
ยถา เวสฺสนฺตรํ รฏฺฐา, ปพฺพาเชนฺติ อทูสกํฯ
[1789]
‘‘อจฺเฉจฺฉุํ วต โภ รุกฺขํ, สพฺพกามททํ ทุมํ;
ยถา เวสฺสนฺตรํ รฏฺฐา, ปพฺพาเชนฺติ อทูสกํฯ
[1790]
‘‘อจฺเฉจฺฉุํ วต โภ รุกฺขํ, สพฺพกามรสาหรํ;
ยถา เวสฺสนฺตรํ รฏฺฐา, ปพฺพาเชนฺติ อทูสกํฯ
[1791]
‘‘เย วุฑฺฒา เย จ ทหรา, เย จ มชฺฌิมโปริสา;
พาหา ปคฺคยฺห ปกฺกนฺทุํ, นิกฺขมนฺเต มหาราเช;
สิวีนํ รฏฺฐวฑฺฒเนฯ
[1792]
‘‘อติยกฺขา วสฺสวรา, อิตฺถาคารา จ ราชิโน;
พาหา ปคฺคยฺห ปกฺกนฺทุํ, นิกฺขมนฺเต มหาราเช;
สิวีนํ รฏฺฐวฑฺฒเนฯ
[1793]
‘‘ถิโยปิ ตตฺถ ปกฺกนฺทุํ, ยา ตมฺหิ นคเร อหุ;
นิกฺขมนฺเต มหาราเช, สิวีนํ รฏฺฐวฑฺฒเนฯ
[1794]
‘‘เย พฺราหฺมณา เย จ สมณา, อญฺเญ วาปิ วนิพฺพกา;
พาหา ปคฺคยฺห ปกฺกนฺทุํ, อธมฺโม กิร โภ อิติฯ
[1795]
‘‘ยถา เวสฺสนฺตโร ราชา, ยชมาโน สเก ปุเร;
สิวีนํ วจนตฺเถน, สมฺหา รฏฺฐา นิรชฺชติฯ
[1796]
‘‘สตฺต หตฺถิสเต ทตฺวา, สพฺพาลงฺการภูสิเต;
สุวณฺณกจฺเฉ มาตงฺเค, เหมกปฺปนวาสเสฯ
[1797]
‘‘อารูฬฺเห คามณีเยหิ, โตมรงฺกุสปาณิภิ;
เอส เวสฺสนฺตโร ราชา, สมฺหา รฏฺฐา นิรชฺชติฯ
[1798]
‘‘สตฺต อสฺสสเต ทตฺวา, สพฺพาลงฺการภูสิเต;
อาชานีเยว ชาติยา, สินฺธเว สีฆวาหเนฯ
[1799]
‘‘อารูฬฺเห คามณีเยหิ, อิลฺลิยาจาปธาริภิ;
เอส เวสฺสนฺตโร ราชา, สมฺหา รฏฺฐา นิรชฺชติฯ
[1800]
‘‘สตฺต รถสเต ทตฺวา, สนฺนทฺเธ อุสฺสิตทฺธเช;
ทีเป อโถปิ เวยคฺเฆ, สพฺพาลงฺการภูสิเตฯ
[1801]
‘‘อารูฬฺเห คามณีเยหิ, จาปหตฺเถหิ วมฺมิภิ;
เอส เวสฺสนฺตโร ราชา, สมฺหา รฏฺฐา นิรชฺชติฯ
[1802]
‘‘สตฺต อิตฺถิสเต ทตฺวา, เอกเมกา รเถ ฐิตา;
สนฺนทฺธา นิกฺขรชฺชูหิ, สุวณฺเณหิ อลงฺกตาฯ
[1803]
‘‘ปีตาลงฺการา ปีตวสนา, ปีตาภรณวิภูสิตา;
อฬารปมฺหา หสุลา, สุสญฺญา ตนุมชฺฌิมา;
เอส เวสฺสนฺตโร ราชา, สมฺหา รฏฺฐา นิรชฺชติฯ
[1804]
‘‘สตฺต เธนุสเต ทตฺวา, สพฺพา กํสุปธารณา [กุสุมธาริเน (ก.)];
เอส เวสฺสนฺตโร ราชา, สมฺหา รฏฺฐา นิรชฺชติฯ
[1805]
‘‘สตฺต ทาสิสเต ทตฺวา, สตฺต ทาสสตานิ จ;
เอส เวสฺสนฺตโร ราชา, สมฺหา รฏฺฐา นิรชฺชติฯ
[1806]
‘‘หตฺถี อสฺสรเถ [อสฺเส รเถ (สฺยา.)] ทตฺวา, นาริโย จ อลงฺกตา;
เอส เวสฺสนฺตโร ราชา, สมฺหา รฏฺฐา นิรชฺชติฯ
[1807]
‘‘ตทาสิ ยํ ภิํสนกํ, ตทาสิ โลมหํสนํ;
มหาทาเน ปทินฺนมฺหิ, เมทนี สมฺปกมฺปถฯ
[1808]
‘‘ตทาสิ ยํ ภิํสนกํ, ตทาสิ โลมหํสนํ;
ยํ ปญฺชลิกโต ราชา, สมฺหา รฏฺฐา นิรชฺชติฯ
[1809]
‘‘อเถตฺถ วตฺตตี สทฺโท, ตุมุโล เภรโว มหา;
ทาเนน ตํ นีหรนฺติ, ปุน ทานํ อทา ตุวํฯ
[1810]
‘‘เตสุ มตฺตา กิลนฺตาว, สมฺปตนฺติ วนิพฺพกา;
นิกฺขมนฺเต มหาราเช, สิวีนํ รฏฺฐวฑฺฒเน’’ฯ
[1811]
‘‘อามนฺตยิตฺถ ราชานํ, สญฺชยํ ธมฺมินํ วรํ [ธมฺมิกํวรํ (สฺยา. ก.)];
อวรุทฺธสิ มํ เทว, วงฺกํ คจฺฉามิ ปพฺพตํฯ
[1812]
‘‘เย หิ เกจิ มหาราช, ภูตา เย จ ภวิสฺสเร;
อติตฺตาเยว กาเมหิ, คจฺฉนฺติ ยมสาธนํฯ
[1813]
‘‘สฺวาหํ สเก อภิสฺสสิํ, ยชมาโน สเก ปุเร;
สิวีนํ วจนตฺเถน, สมฺหา รฏฺฐา นิรชฺชติฯ
[1814]
‘‘อฆํ ตํ ปฏิเสวิสฺสํ, วเน วาฬมิคากิณฺเณ;
ขคฺคทีปินิเสวิเต, อหํ ปุญฺญานิ กโรมิ;
ตุมฺเห ปงฺกมฺหิ สีทถ’’ฯ
[1815]
‘‘อนุชานาหิ มํ อมฺม, ปพฺพชฺชา มม รุจฺจติ;
สฺวาหํ สเก อภิสฺสสิํ, ยชมาโน สเก ปุเร;
สิวีนํ วจนตฺเถน, สมฺหา รฏฺฐา นิรชฺชติฯ
[1816]
‘‘อฆํ ตํ ปฏิเสวิสฺสํ, วเน วาฬมิคากิณฺเณ;
ขคฺคทีปินิเสวิเต, อหํ ปุญฺญานิ กโรมิ;
ตุมฺเห ปงฺกมฺหิ สีทถ [วงฺกํ คจฺฉามิ ปพฺพตํ (ก.)]ฯ
[1817]
‘‘อนุชานามิ ตํ ปุตฺต, ปพฺพชฺชา เต สมิชฺฌตุ;
อยญฺจ มทฺที กลฺยาณี, สุสญฺญา ตนุมชฺฌิมา;
อจฺฉตํ สห ปุตฺเตหิ, กิํ อรญฺเญ กริสฺสติ’’ฯ
[1818]
‘‘นาหํ อกามา ทาสิมฺปิ, อรญฺญํ เนตุมุสฺสเห;
สเจ อิจฺฉติ อนฺเวตุ, สเจ นิจฺฉติ อจฺฉตุ’’ฯ
[1819]
‘‘ตโต สุณฺหํ มหาราชา, ยาจิตุํ ปฏิปชฺชถ;
มา จนฺทนสมาจาเร, รโชชลฺลํ อธารยิฯ
[1820]
‘‘มา กาสิยานิ ธาเรตฺวา [กาสิยานิ จ ธาเรตฺวา (ก.)], กุสจีรํ อธารยิ;
ทุกฺโข วาโส อรญฺญสฺมิํ, มา หิ ตฺวํ ลกฺขเณ คมิฯ
[1821]
‘‘ตมพฺรวิ ราชปุตฺตี, มทฺที สพฺพงฺคโสภนา;
นาหํ ตํ สุขมิจฺเฉยฺยํ, ยํ เม เวสฺสนฺตรํ วินา’’ฯ
[1822]
‘‘ตมพฺรวิ มหาราชา, สิวีนํ รฏฺฐวฑฺฒโน;
อิงฺฆ มทฺที นิสาเมติ, วเน เย โหนฺติ ทุสฺสหาฯ
[1823]
‘‘พหู กีฏา ปฏงฺคา จ, มกสา มธุมกฺขิกา;
เตปิ ตํ ตตฺถ หิํเสยฺยุํ, ตํ เต ทุกฺขตรํ สิยาฯ
[1824]
‘‘อปเร ปสฺส สนฺตาเป, นทีนุปนิเสวิเต;
สปฺปา อชครา นาม, อวิสา เต มหพฺพลาฯ
[1825]
‘‘เต มนุสฺสํ มิคํ วาปิ, อปิ มาสนฺนมาคตํ;
ปริกฺขิปิตฺวา โภเคหิ, วสมาเนนฺติ อตฺตโนฯ
[1826]
‘‘อญฺเญปิ กณฺหชฏิโน [กณฺหชฏิลา (ก.)], อจฺฉา นาม อฆมฺมิคา;
น เตหิ ปุริโส ทิฏฺโฐ, รุกฺขมารุยฺห มุจฺจติฯ
[1827]
‘‘สงฺฆฏฺฏยนฺตา สิงฺคานิ, ติกฺขคฺคาติปฺปหาริโน [ติกฺขคฺคานิ ปหาริโน (สี. สฺยา.)];
มหิํสา วิจรนฺเตตฺถ, นทิํ โสตุมฺพรํ ปติฯ
[1828]
‘‘ทิสฺวา มิคานํ ยูถานํ, ควํ สญฺจรตํ วเน;
เธนุว วจฺฉคิทฺธาว, กถํ มทฺทิ กริสฺสสิฯ
[1829]
‘‘ทิสฺวา สมฺปติเต โฆเร, ทุมคฺเคสุ ปฺลวงฺคเม;
อเขตฺตญฺญาย เต มทฺทิ, ภวิสฺสเต มหพฺภยํฯ
[1830]
‘‘ยา ตฺวํ สิวาย สุตฺวาน, มุหุํ อุตฺตสยี [อุตฺตสเส (สี. สฺยา. ก.)] ปุเร;
สา ตฺวํ วงฺกมนุปฺปตฺตา, กถํ มทฺทิ กริสฺสสิฯ
[1831]
‘‘ฐิเต มชฺฌนฺหิเก [มชฺฌนฺติเก (สี. สฺยา. ปี.)] กาเล, สนฺนิสินฺเนสุ ปกฺขิสุ;
สณเตว พฺรหารญฺญํ, ตตฺถ กิํ คนฺตุมิจฺฉสิ’’ฯ
[1832]
‘‘ตมพฺรวิ ราชปุตฺตี, มทฺที สพฺพงฺคโสภนา;
ยานิ เอตานิ อกฺขาสิ, วเน ปฏิภยานิ เม;
สพฺพานิ อภิสมฺโภสฺสํ, คจฺฉญฺเญว รเถสภฯ
[1833]
‘‘กาสํ กุสํ โปฏกิลํ, อุสิรํ มุญฺชปพฺพชํ [มุญฺชพพฺพชํ (สี.)];
อุรสา ปนุทหิสฺสามิ, นสฺส เหสฺสามิ ทุนฺนยาฯ
[1834]
‘‘พหูหิ วต จริยาหิ, กุมารี วินฺทเต ปติํ;
อุทรสฺสุปโรเธน, โคหนุเวฐเนน จฯ
[1835]
‘‘อคฺคิสฺส ปาริจริยาย, อุทกุมฺมุชฺชเนน จ;
เวธพฺยํ [เวธพฺพํ (สี. ปี.)] กฏุกํ โลเก, คจฺฉญฺเญว รเถสภฯ
[1836]
‘‘อปิสฺสา โหติ อปฺปตฺโต, อุจฺฉิฏฺฐมปิ ภุญฺชิตุํ;
โย นํ หตฺเถ คเหตฺวาน, อกามํ ปริกฑฺฒติ;
เวธพฺยํ กฏุกํ โลเก, คจฺฉญฺเญว รเถสภฯ
[1837]
‘‘เกสคฺคหณมุกฺเขปา , ภูมฺยา จ ปริสุมฺภนา;
ทตฺวา จ โนปกฺกมติ, พหุทุกฺขํ อนปฺปกํ;
เวธพฺยํ กฏุกํ โลเก, คจฺฉญฺเญว รเถสภฯ
[1838]
‘‘สุกจฺฉวี เวธเวรา, ทตฺวา สุภคมานิโน;
อกามํ ปริกฑฺฒนฺติ, อุลูกญฺเญว วายสา;
เวธพฺยํ กฏุกํ โลเก, คจฺฉญฺเญว รเถสภฯ
[1839]
‘‘อปิ ญาติกุเล ผีเต, กํสปชฺโชตเน วสํ;
เนวาภิวากฺยํ น ลเภ, ภาตูหิ สขินีหิปิ [สขิกาหิ จ (สี. ปี.)];
เวธพฺยํ กฏุกํ โลเก, คจฺฉญฺเญว รเถสภฯ
[1840]
‘‘นคฺคา นที อนูทกา, นคฺคํ รฏฺฐํ อราชกํ;
อิตฺถีปิ วิธวา นคฺคา, ยสฺสาปิ ทส ภาตโร;
เวธพฺยํ กฏุกํ โลเก, คจฺฉญฺเญว รเถสภฯ
[1841]
‘‘ธโช รถสฺส ปญฺญาณํ, ธูโม ปญฺญาณมคฺคิโน;
ราชา รถสฺส ปญฺญาณํ, ภตฺตา ปญฺญาณมิตฺถิยา;
เวธพฺยํ กฏุกํ โลเก, คจฺฉญฺเญว รเถสภฯ
[1842]
‘‘ยา ทลิทฺที ทลิทฺทสฺส, อฑฺฒา อฑฺฒสฺส กิตฺติมํ;
ตํ เว เทวา ปสํสนฺติ, ทุกฺกรญฺหิ กโรติ สาฯ
[1843]
‘‘สามิกํ อนุพนฺธิสฺสํ, สทา กาสายวาสินี;
ปถพฺยาปิ อภิชฺชนฺตฺยา [อเภชฺชนฺตฺยา (สี. ปี.)], เวธพฺยํ กฏุกิตฺถิยาฯ
[1844]
‘‘อปิ สาครปริยนฺตํ, พหุวิตฺตธรํ มหิํ;
นานารตนปริปูรํ , นิจฺเฉ เวสฺสนฺตรํ วินาฯ
[1845]
‘‘กถํ นุ ตาสํ หทยํ, สุขรา วต อิตฺถิโย;
ยา สามิเก ทุกฺขิตมฺหิ, สุขมิจฺฉนฺติ อตฺตโนฯ
[1846]
‘‘นิกฺขมนฺเต มหาราเช, สิวีนํ รฏฺฐวฑฺฒเน;
ตมหํ อนุพนฺธิสฺสํ, สพฺพกามทโท หิ เม’’ฯ
[1847]
‘‘ตมพฺรวิ มหาราชา, มทฺทิํ สพฺพงฺคโสภนํ;
อิเม เต ทหรา ปุตฺตา, ชาลี กณฺหาชินา จุโภ;
นิกฺขิปฺป ลกฺขเณ คจฺฉ, มยํ เต โปสยามเส’’ [โปสิยามเส (สี. ปี. ก.)]ฯ
[1848]
‘‘ตมพฺรวิ ราชปุตฺตี, มทฺที สพฺพงฺคโสภนา;
ปิยา เม ปุตฺตกา เทว, ชาลี กณฺหาชินา จุโภ;
ตฺยมฺหํ ตตฺถ รเมสฺสนฺติ, อรญฺเญ ชีวโสกินํ’’ฯ
[1849]
‘‘ตมพฺรวิ มหาราชา, สิวีนํ รฏฺฐวฑฺฒโน;
สาลีนํ โอทนํ ภุตฺวา, สุจิํ มํสูปเสจนํ;
รุกฺขผลานิ ภุญฺชนฺตา, กถํ กาหนฺติ ทารกาฯ
[1850]
‘‘ภุตฺวา สตปเล กํเส, โสวณฺเณ สตราชิเก;
รุกฺขปตฺเตสุ ภุญฺชนฺตา, กถํ กาหนฺติ ทารกาฯ
[1851]
‘‘กาสิยานิ จ ธาเรตฺวา, โขมโกฏุมฺพรานิ จ;
กุสจีรานิ ธาเรนฺตา, กถํ กาหนฺติ ทารกาฯ
[1852]
‘‘วยฺหาหิ ปริยายิตฺวา, สิวิกาย รเถน จ;
ปตฺติกา ปริธาวนฺตา, กถํ กาหนฺติ ทารกาฯ
[1853]
‘‘กูฏาคาเร สยิตฺวาน, นิวาเต ผุสิตคฺคเฬ;
สยนฺตา รุกฺขมูลสฺมิํ, กถํ กาหนฺติ ทารกาฯ
[1854]
‘‘ปลฺลงฺเกสุ สยิตฺวาน, โคนเก จิตฺตสนฺถเต;
สยนฺตา ติณสนฺถาเร, กถํ กาหนฺติ ทารกาฯ
[1855]
‘‘คนฺธเกน วิลิมฺปิตฺวา, อครุจนฺทเนน จ;
รโชชลฺลานิ ธาเรนฺตา, กถํ กาหนฺติ ทารกาฯ
[1856]
‘‘จามรโมรหตฺเถหิ, พีชิตงฺคา สุเขธิตา [สุเข ฐิตา (สฺยา. ปี.)];
ผุฏฺฐา ฑํเสหิ มกเสหิ, กถํ กาหนฺติ ทารกา’’ฯ
[1857]
‘‘ตมพฺรวิ ราชปุตฺตี, มทฺที สพฺพงฺคโสภนา;
มา เทว ปริเทเวสิ, มา จ ตฺวํ วิมโน อหุ;
ยถา มยํ ภวิสฺสาม, ตถา เหสฺสนฺติ ทารกาฯ
[1858]
‘‘อิทํ วตฺวาน ปกฺกามิ, มทฺที สพฺพงฺคโสภนา;
สิวิมคฺเคน อนฺเวสิ, ปุตฺเต อาทาย ลกฺขณา’’ฯ
[1859]
ตโต เวสฺสนฺตโร ราชา, ทานํ ทตฺวาน ขตฺติโย;
ปิตุ มาตุ จ วนฺทิตฺวา, กตฺวา จ นํ ปทกฺขิณํฯ
[1860]
จตุวาหิํ รถํ ยุตฺตํ, สีฆมารุยฺห สนฺทนํ;
อาทาย ปุตฺตทารญฺจ, วงฺกํ ปายาสิ ปพฺพตํฯ
[1861]
ตโต เวสฺสนฺตโร ราชา, เยนาสิ พหุโก ชโน;
‘‘อามนฺต โข ตํ คจฺฉาม, อโรคา โหนฺตุ ญาตโย’’ฯ
[1862]
‘‘อิงฺฆ มทฺทิ นิสาเมหิ, รมฺมรูปํว ทิสฺสติ;
อาวาสํ สิวิเสฏฺฐสฺส, เปตฺติกํ ภวนํ มม’’ฯ
[1863]
‘‘ตํ พฺราหฺมณา อนฺวคมุํ, เต นํ อสฺเส อยาจิสุํ;
ยาจิโต ปฏิปาเทสิ, จตุนฺนํ จตุโร หเย’’’ฯ
[1864]
‘‘อิงฺฆ มทฺทิ นิสาเมหิ, จิตฺตรูปํว ทิสฺสติ;
มิคโรหิจฺจวณฺเณน, ทกฺขิณสฺสา วหนฺติ มํ’’ฯ
[1865]
‘‘อเถตฺถ ปญฺจโม อาคา, โส ตํ รถมยาจถ;
ตสฺส ตํ ยาจิโตทาสิ, น จสฺสุปหโต มโนฯ
[1866]
‘‘ตโต เวสฺสนฺตโร ราชา, โอโรเปตฺวา [โอตาเรตฺวา (ก.)] สกํ ชนํ;
อสฺสาสยิ อสฺสรถํ, พฺราหฺมณสฺส ธเนสิโน’’ฯ
[1867]
‘‘ตฺวํ มทฺทิ กณฺหํ คณฺหาหิ, ลหุ เอสา กนิฏฺฐิกา;
อหํ ชาลิํ คเหสฺสามิ, ครุโก ภาติโก หิ โส’’ฯ
[1868]
‘‘ราชา กุมารมาทาย, ราชปุตฺตี จ ทาริกํ;
สมฺโมทมานา ปกฺกามุํ, อญฺญมญฺญํ ปิยํวทา’’ฯ
ทานกณฺฑํ นามฯ
วนปเวสนํ
[1869]
‘‘ยทิ เกจิ มนุชา เอนฺติ, อนุมคฺเค ปฏิปเถ;
มคฺคํ เต ปฏิปุจฺฉาม, กุหิํ วงฺกตปพฺพโตฯ
[1870]
‘‘เต ตตฺถ อมฺเห ปสฺสิตฺวา, กลุนํ ปริเทวยุํ;
ทุกฺขํ เต ปฏิเวเทนฺติ, ทูเร วงฺกตปพฺพโต’’ฯ
[1871]
‘‘ยทิ ปสฺสนฺติ ปวเน, ทารกา ผลิเน [ผลิเต (สี. สฺยา. ปี.)] ทุเม;
เตสํ ผลานํ เหตุมฺหิ, อุปโรทนฺติ ทารกาฯ
[1872]
‘‘โรทนฺเต ทารเก ทิสฺวา, อุพฺพิทฺธา [อุพฺพิคฺคา (สี. สฺยา. ปี.)] วิปุลา ทุมา;
สยเมโวนมิตฺวาน, อุปคจฺฉนฺติ ทารเกฯ
[1873]
‘‘อิทํ อจฺเฉรกํ ทิสฺวา, อพฺภุตํ โลมหํสนํ;
สาธุการํ ปวตฺเตสิ, มทฺที สพฺพงฺคโสภนาฯ
[1874]
‘‘อจฺเฉรํ วต โลกสฺมิํ, อพฺภุตํ โลมหํสนํ;
เวสฺสนฺตรสฺส เตเชน, สยเมโวนตา ทุมา’’ฯ
[1875]
‘‘สงฺขิปิํสุ ปถํ ยกฺขา, อนุกมฺปาย ทารเก;
นิกฺขนฺตทิวเสเนว, เจตรฏฺฐํ อุปาคมุํ’’ฯ
[1876]
‘‘เต คนฺตฺวา ทีฆมทฺธานํ, เจตรฏฺฐํ อุปาคมุํ;
อิทฺธํ ผีตํ ชนปทํ, พหุมํสสุโรทนํ’’ฯ
[1877]
‘‘เจติโย ปริวาริํสุ, ทิสฺวา ลกฺขณมาคตํ;
สุขุมาลี วต อยฺยา, ปตฺติกา ปริธาวติฯ
[1878]
‘‘วยฺหาหิ ปริยายิตฺวา, สิวิกาย รเถน จ;
สาชฺช มทฺที อรญฺญสฺมิํ, ปตฺติกา ปริธาวติ’’ฯ
[1879]
‘‘ตํ ทิสฺวา เจตปาโมกฺขา, โรทมานา อุปาคมุํ;
กจฺจิ นุ เทว กุสลํ, กจฺจิ เทว อนามยํ;
กจฺจิ ปิตา อโรโค เต, สิวีนญฺจ อนามยํฯ
[1880]
‘‘โก เต พลํ มหาราช, โก นุ เต รถมณฺฑลํ;
อนสฺสโก อรถโก, ทีฆมทฺธานมาคโต;
กจฺจามิตฺเตหิ ปกโต, อนุปฺปตฺโตสิมํ ทิสํ’’ฯ
[1881]